ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Зри, совопросниче, второе Пилатово вопрошение, Иисусово отвещание: О себе ли ты се (л. 987 об.) [1590] глаголеши, или инии тебе рекоша о Мне? Се же сотвори, да обличит жидовское. Таже отвеща Ему Пилат: Еда аз жидовин есмь, не Иисуса укоряя, но жидовское злодейство, род Твой, рече, архиерее предаша Тя мне. Что еси сотворил? Отвеща Иисус: Царьство Мое несть от мира сего. Аще от мира сего было бы царьство Мое, слуги Моя убо подвизались быша, да не предан бых был июдеом. Ныне же Царьство Мое несть отсюду.

Зри ли, совопросниче, прекословие Иисусово к Пилату. Пилату убо глаголющу ко Иисусу: Род Твой архиерее предаша Тя мне. Что еси сотворил? Иисус же к первому вопросу отвещевает, являя Свое Царьство (л. 988) [1591] не земное, но Небесное быти, тем же и глаголет: Царьство Мое несть от мира сего. Паки рече Ему Пилат: Убо царь ли еси Ты? Отвеща ему Иисус: Ты глаголеши, яко царь есмь Аз. Аз не се родихся и на се приидох в мир, да свидетельствую истину и всяк, еже есть от истины, послушает гласа Моего. Глагола Ему Пилат: Что есть истина? И се рек, паки изыде ко июдеом и глагола им: Аз ни единыя вины обретаю в Нем. Отвеща ему июдее: Мы закон имамы и по закону нашему должен есть умрети, яко Себе Сына Божия сотвори. Егда же услыша Пилат се слово, паче убояся и вниде в претор паки и глагола Иисусови: Откуду еси Ты? Иисус же ответа не даст (л. 988 об.) [1592] ему. Глагола же Ему Пилат: Мне ли не глаголеши, не веси ли, яко власть имам распяти Тя и власть имам пустити Тя? Отвеща Иисус: Не имаши власти ни единыя на Мне, аще не бы ти дано свыше. Сего ради предавый Мя тебе более грех имать. От сего искати Пилат пустити Его, июдее же вопияху, глаголюще: Аще Сего пустиши, неси друг кесарев, всяк, иже царя себе творяй, противится кесарю.

Видиши ли, совопросниче, язычника Пилата милосердующа о Иисусе, а мы царя нашего ничим не преобидим, ни царем нарицаемся, якоже есмь, тако и есть. Аще нецыи жидовски подражают, они убо (л. 989) [1593] отрицающеся Христа Спасителя своего, глаголюще: Не имамы Царя, токмо кесаря. Тако и ныне, нам де не надобен патриарх, добр и Крутицкой митрополит.

Тако и ныне воследующим святым Его заповедем, не подобает покорятись нудящим мирским судиам отвещати в суде, ни поучатися, якоже Господь заповедал, глаголя: Внемлите [1594] же от человек, предадят бо вы на сонмы и на соборищих избиют вас. Пред [1595] владыки же и цари ведени будете Мене ради, во свидетельство им и языком. Егда [1596] же предают вы, не пецытеся, како речете или что возглаголете, даст бо ся вам в той час, (л. 989 об.) [1597] что возглаголете, не вы бо будете глаголющии, но Дух Отца вашего глаголяй в вас, якоже пишется в Деяниих книг апостол: И [1598] исполнишася вся Духа Свята и начаша глаголати инеми языки, якоже Дух даяше им провещавати. И тако со дерзновением апостоли глаголаху. Став [1599] же Петр со единемнадесяте, воздвиже глас свой, рече им. И по мале. Бысть [1600] же на утреи собратися князем их и старцем и книжником во Иерусалиме, и Анна архиерей, и Каиафа, и Иоанн, и Александр и елицы беша от рода архиерейска. И поставиша их посреде, вопрошаху: Коею силою или коим именем сотвористе се вы? (л. 990) [1601] Тогда Петр, исполнився Духа Свята, рече к ним. И прочая.

Видяще ж Петрово дерзновение и Иоанново и разумеша, яко человека не книжна еста и проста дивляхуся, зная же их, яко со Иисусом беста, ничто же имяху противу рещи. Повелевше има вон из сонмища изыти, стязаху же ся к себе, глаголюще: Что сотворил человекома сима, яко убо разумно знамение бысть има, всем живущим во Иерусалиме яве, и не можем отврещися, но да не боле распрострется в людех. Прещением да запретим има к тому не возглаголати о Имени сем, ни единому от человек. И призвавше их, заповедаша има (л. 990 об.) [1602] отнюдь не провещавати, ни учити от имени Иисусове.

Петр же и Иоанн, отвещавше к ним, реста: Аще праведно есть пред Богом вас послушати паче, нежели Бога, судите. Не можем бо мы, яже видехом и слышахом, не глаголати. Они же запрещше има пустиша их, ничто же обретше, како мучити их людии ради. Тако [1603] Павел ко Агриппе и Фисту со дерзновением глагола и проповедая Царьствие Божие и уча, иже о Господе нашем Иисусе Христе со всяким дерзновением невозбранно.

И аще не бы христианский царь был и христианским законом сам не подлежал и нуждею влачим на суд, хотящим судитися с нами, (л. 991) [1604] то и сему закон положил Христос во святем Евангелии. И [1605] хотящему судитися с тобою и ризу твою взяти, отпусти ему и срачицу, а иже и сущим во Евангелстей заповеди, аще и царь, аще и князь, кто будет превыше своего достояния власти, чрез Божественыя заповеди да не судит, то есть священнаго чину, понеже священство и самаго царьствия преболе. О сем же много есть явлено напреди, понеже нигде ж есть явлено, еже бы Господь царем и князем рекл: Приимите [1606] Дух Свят, им же отпустите грехи, отпустятся, и им же держите, держатся. Аминь, глаголю вам, елика аще свяжете на земли, будут связана (л. 991 об.) [1607] на небеси, и елика аще разрешите на земли, будут разрешена на небеси. Но кому ли сие речется? Святым Его учеником и апостолом и по них приемником тех власти и достояния архиереом, а не царем и князем.

Зри, ныне бываемое, аще и чрез Божественыя правила собора, иже в Карфагене, правило 7 и 43. Еже царие наши по своей воли священником исповедаются, а не архиереом, и от них во всех своих гресех суд приемлют и запрещение и их же хотят каковых любо грехов тяжких связати, яко связани мнятся быти, и их же разрешат, яко разрешени мнятся. Увы, яко (л. 992) [1608] и у Бога не разрешени суть. Тем же слезити и плакати, и не просто плакати, но и рыдати над ходитми, яко погибель таковии идут, ибо единем архиереом таковая власть дадеся от Господа, еже вязати и решити грехи, а не просто и священником. Якоже воследование в молитвословии показуется, но обаче аще и от обычая таковое самочиние привниде, и терпят царие и князи священническое запрещение и разрешение, правду мнят быти, колми паче подобает архиереов слушати, а не судити. О них же Господь рече: Слушаяй вас, Мене слушает, и отметаяйся вас, Мене отметается. (л. 992 об.) [1609] И аще не слушаяй и отметаяйся вас, Мене отметается, рече Господь. А иже кто дерзает судити несудимаго колми паче неистовится на Господа. Тем же к таковым Господь з запрещением глаголет: Не [1610] судите, да не судими будете, им же бо судом судите, осудитеся, то есть, якоже вы Мой суд неправедно восхитисте, не даный вам, царие и князи, и вознеистовистеся на рабов Моих, архиереов и прочих священнаго чина, и неправедно осудисте, Аз вас праведно осужду, по делом вашим. Тем же и наводит, глаголя, аки уча и запрещая: Не [1611] судите и не осудитеся, не осуждайте, и не осуждени будете. Такожде (л. 993) [1612] и божественный апостол Павел засвидетельствует, глаголя: Тем [1613] же не прежде времени судите, дондеже приидет Господь, иже просветит тайная тмы и явит советы сердечныя. И тогда похвала будет коемуждо от Бога. И паки глаголет: Ты [1614] кто еси, судяй чюждему рабу, своему Господеви стоит или падает, станет же, силен бо есть Бог возставити его. И паки: Что имаши, еже не приял еси. А кой же хотящим судитися пред мирскими судиами от священнаго чина, коего любо суть, апостол завещает, сице глаголя: Смеет [1615] ли кто вещь имея ко иному судитися о неправедных, а не о святых, или не весте, яко (л. 993 об.) [1616] святии миру судят.

Зриши ли, совопросниче, яко и тогда мирови [1617] хотят судити, како ныне хощеши тем судити, или како кто стерпит судим быти, им же сам хощет судити, будут же судити не сами седяще и слово истязующе, но осудят. Сие убо являя, глаголаше: И аще вами суд приемлет мир, не достойни есте судищем худым. Вещь, рече, вам приносит срам и уничижение неизглаголанно, понеже подобно им бе, от внутрених судимым срамлятися. Противное убо есть срам, рече, егда от внешних судитеся, оная бо судища наихуждшая есть, не сия, (л. 994) [1618] не весте ли, яко ангелом судити будем, и не точию житейским.

Зриши ли преизлишество чести священства, еже рече Павел, яко и ангелом судити хощем, а не точию житейским. Како мощно святым от житейских суд прияти? Тем же и навед, рече: Житейская убо судилища аще имате, уничиженых в церкви, сих посаждаете и сраму вам глаголю. Тако ли ни един в вас мудр, иже может разсудити между братий своих. Сие глаголет: Аще кто возглаголет, яко ни един в вас мудр, ниже доволен разсудити, удобь небрегоми вси. И что сие? Аще и ни един есть, рече, мудр, (л. 994 об.) [1619] остави и не мудрым по власти и достоянию судити, да не срам обоим будет, еже овому судити, житейскому глаголю, овому от житейскаго судитися.