ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Сотвористе [654] убо плоды достойны покаянию и не начинайте глаголати в себе отца имамы Авраама. Глаголю бо вам, яко может Бог от камения сего воздвигнути чада Аврааму, уже бо и секира при корени древа лежит. Всяко убо древо, не творящее плода добра, посекается и во огнь вметается.

Яко [655] ничто же ползуют себе сожительствующии угодным Богови и свое мудрование не исправляюще, аще и по видимому к ним приносят подобие.

Тогда [656] уподобися Царство Небесное десятим девам, яже прияша светилники своя и изыдоша во сретение Жениху, пять (л. 175) [657] бе от них мудры и пять буия. Буия же приемше светилники своя, не взяша с собою елеа. Мудрыя же взяша елеа в сосудех своих. И приводит по мале о буих.

Господи, Господи, отверзи нам. Он же отвещав, рече: Аминь, глаголю вам, не веде вас. Глаголю [658] же вам, в ту нощь два будета на ложи своем, един поемлется, а другий оставляется. Две мелющи вкупе, едина поемлется и другая оставляется. И отвещавше, реша Ему: Господи, Господи. Он же рече им: Идеже труп, тамо соберутся орли. Не вси, иже от Авраама, сии суть сынове Авраамли, но иже дела Авраамская сотворит, сей сын (л. 175 об.) [659] Авраамль есть. Ни иже от Израиля, сии суть израилтяне, но иже дела израилтейска сотворит, он есть израилтянин.

Писано есть: Вера без дел мертва есть, тако и ты без дел своих, на иных надеяся делы, мертв еси от жизни праведных, почто живых соблажняеши.

Ты же глаголеши, приказано Крутицкому митрополиту от благочестиваго государя нашего, что он по сей день чинствует церковныя правила. Добро, как остался Аарон и Ор наместники Моисеовы, покаместа возвратился Моисей от горы Синайския со крыжали завета, чтоб не был люд израилтейский без главы, пустой. Велико нечто было воистину, то не оставил (л. 176) [660] не на многия дни без началника и оберегателя. А Никон, которой отступился чрез толко месяцей и лет, не радел, чтоб написал ко благочестивому царю, чтоб поберег его престол. Однако же зделал как странный и чюжий епископ без всякаго порядку и прилежности. А добро ведаем, кто добрый пастырь душю свою положит за овцы своя.

Как в преждних своих ответех, злоумне, неправедно писал, тако и зде солгал, еже добро, глаголеши, что приказал государь Крутицкому митрополиту. Писано [661] есть: Верный в мале и во мнозе верен. Не верный в мале и во мнозе не верен есть. Покажи известно (л. 176 об.) [662] не от своих гнилых произношеней, но от Божественаго Писания, где есть такия законы, да царие в церковных преданиох и уставох исправляют и повелевают, якоже ты глаголеши. Аз же ти покажу.

Господу глаголющу: Никто [663] же может двема господинома работати. Любо единаго возлюбит, а другаго возненавидит, или единому прилежит, а другаго не радит. Не можете Богу работати и мамоне.

Аз от Бога изыдох и приидох, не бо от себе приидох, но Он мя посла.

Мне [664] подобает делати дела пославшаго мя. И в Нем же аще кто призван, в том да пребывает. (л. 177) [665] Что бо имаши, еже не приял еси? Како же проповедят, аще не послани будут? Егда [666] раби бесте греху, свободни бесте от правды. Да никто же вас лстит тщимы словесы. Сих [667] бо ради грядет гнев Божий на сыны противныя. Доволно ли ти есть ко указанию, яко не подобает не сущими своими владети или повелевати, аще мнит царь, яко добро творит, владея и повелевая во священных уставох, не чюдися, что Бог терпит на болшее и лютейшее отмщение.

Писано есть: Приидоша [668] же нецыи в то время, возвещающе Ему о галилеох, их же кровь Пилат смеси с жертвами их. (л. 177 об.) [669] И отвещав Иисус, рече им: Мните ли, яко галилеане сии грешнейши паче всех, галилеани бяху яко сице пострадаша. Ни, глаголю вам, но аще не покаетеся, вси такожде погибнете. Или о богатстве благости Его в пождании в долготерпении не радиши, не ведый, яко благость Божия на покаяние тя ведет. По жесточеству же твоему и по непокаянному сердцу, щадиши себе гнев в день гнева и откровения праведнаго суда Божия, иже воздаст коемуждо по делом его.

Яко [670] не искусиша Бога имети в разуме, сего ради предаст их Бог, а неискусен ум творити неподобная.

Елма [671] любовь не прияша (л. 178) [672] истинную, спастися им. Сего ради посла им Бог действо прелести, воеже веровати им во лжу.

И ты, ответотворче, приводиши от древняго писания, добро как остался Аарон и Ор. Что же чюдесно показали, остався Аарон и Ор, якоже пишется во Исходе книг: Видевше [673] же людие, яко умедли Моисей снити с горы, восташа людие на Аарона и глаголаша ему: Востани и сотвори нам боги, иже пойдут пред нами. Моисей, бо сей человек, иже изведе нас из Египта, не вемы, что ему бысть. Рече же им Аарон: Измите усерязи златыя из ушию жен ваших и дщерей и принесите ко мне. И со(л. 178 об.)твориша [674] тако. И взя от руку их, и слияв образ, и сотвори им телец лиян. И рекоша: Сии бози твои, Израилю, иже тя изведоша из земли Египецкия. Видеша же, Аарон созда олтарь прямо ему и проповеда Аарон велик день Господень утре, и обутрив наутрия, и вознесе сожжения, и принесе требу спасения, и седоша людие ясти и пити, и восташа играти. И рече Господь к Моисею, глаголя: Сниди скоро отсюду, беззаконниша бо людие твои, их же извел еси из земли Египецкия. Преступиша с пути скоро, иже заповедал еси им, и сотвориша себе телец и поклонишася ему, и жертвоваша, глаголюще: Сии бози твои, Израилю, иже из(л. 179)ведоша [675] тя из земли Египецкия. Ныне же не дей Мене, да возъярився гневом на ня, потреблю. И прочее.

Да се ли ты, измождаше, приводиши во свидетельство, древнее беззаконие людей обновляя, еже бы и ныне тожде Господь сотворил? А уже и есть и будет. Аще не обратятся [676] от злоб своих койждо их, якоже и тогда поби Господь, якоже есть писано.

И [677] прогневаша Моисея в стану и Аарона святаго Господня. И отверзеся земля и пожре Дафана и покры на сонмищи Авирона. И разжеся огнь в сонме их, пламень попали грешники. И сотвориша телец в Хориве и поклонишася истуканному, и измениша славу Его в подобие тельца [678], (л. 179 об.) [679] ядущаго траву, и рече: Потребити их, аще не бы Моисей избранный Его стал в сокрушении пред Ним. И возврати ярость Его, да не погубит их.

Да ты же пишешь: Умре Аарон на верху горы, и бысть вместо его Елеазар. Якоже пишется в 4-х книг Моисеовых в 29 главе: И сотвори Моисей, якоже повеле ему Господь, и возведе я на Ор гору пред всем сонмом, и совлече Аарону ризы его, и облече в ня сына его Елеазара, и умре Аарон на версе горы.

Виждь и разсмотри, яко нелепо прежде смерти иному быти архиерею на живаго.

Якоже перваго и втораго собора (л. 180) [680] в церкви святых апостол, правило 16.

Ни по которому же образу да не взыдет кто на епископию, ея же епископ жив есть. Подобает бо вину изыскати, его же хотят изгнати, и по извержении его другаго поставити.

Аще же кто помощию и насилием властельским держит церкви, прочти правило святых апостол 30-е.

Аще [681] кий епископ мирских князь помощию приимет церковь, да извержется и отлучится.

Толкование.

Аще кий епископ мирскими властели избран быв и тех силою приимет Церковь Божию, рекше епископ будет в ней, таковый, яко велие прегрешение согрешив, да будет извержен и да отлучится. Подобает бо хотящему (л. 180 об.) [682] поставитися епископом, от всех епископ сущих во области поставлену быти. Аще ли несть мощно купно всем собратися, поне без всякого извету, от трию епископ да поставлен будет, сложившемся писанием грамот купно и всем не пришедшим епископом.

И святаго Вселенскаго 7-го собора правило 3.

Всяко [683] избрание и поставление, бывающее от мирских властелей, не твердо есть.

Толкование.

Во многих правилех речено есть, еже от всех епископ, сущих во области, аще есть мощно подобает суду и избранию быти, хотящему поставлену быти епископу. Аще ли невозможно всем совокупитися, понеже (л. 181) [684] от триех епископ да поставится, сочетавшемся посланием грамот и не пришедшим епископом. Аще же кто мирскими властели избран будет, и теми церковь некую приимет, рекше по изволению их и по повелению, поставлен будет епископом, не токмо нетвердо есть таковое поставление, но и извержение и отлучение наводит на получившаго тем образом святительство.

Такожде и Лаодикийскаго собора правило 13.

Не избран епископ, иже мирскими человеки избран будет.

Толкование.

Судом и избранием митрополита и сущих во области епископ поставляем бывает епископ. Аще же кто не тако возведен будет (л. 181 об.) [685] на епископство, но мирскими людми избран, не избран есть и не приятен.