ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Сие ведяще, яко ветхий наш человек с Ним сраспятся, да упразднится тело греховное, яко ктому не работати нам греху, умерый бо оправдися от греха. Аще ли же умрохом со Христом, веруем, яко и живи будем с Ним. Ведяще, яко Христос воста от мертвых, к тому уже не умрет, смерть нань к тому не обладает. Еже бо умре греху, умре единою, а еже живет, Богови живет.

(л. 930) [3784] Тако и вы помышляйте себе, мертвым убо быти греху, живым же Богови, о Христе Иисусе Господе нашем, да не царьствует убо грех в мертвенем вашем теле, воеже послушати ему в похотех его, ниже представляйте уды ваша оружие неправды греху, но представляйте себе Богови. Яко от мертвых живы и уды ваша оружия правды Богови, грех бо вами да не обладает. Несте бо под законом, но под благодатию, что убо согрешим ли, зане несмы под законом, но под благодатию, да не будет. Не весте ли, яко Ему же представляете себе рабы в послушание, рабы есте (л. 930 об.) [3785] Его послушаете, или греха в смерть или послушания в правду. Смотри апостолское завещание, что имать ползовати крещение, аще дел не будет, от празднаго имени христианскаго не будет спасения, якоже и Великий Василий пишет в правиле 45: Христиан [3786] сый ругаяся Христу, от наречения ползы не приимет.

Толкование.

Вера без дел мертва есть, никая же бо полза от наречения, еже нарицатися христианину, Христовы же заповеди отметати и делы злыми тому ругатися. Но есть ли кто крестився во Христа Иисуса, а заповедей Христовых не творит, таковый клятвопреступник есть, (л. 931) [3787] понеже завет положил со Христом во всем святыя Его заповеди слушати и творити, и не сотвори по воли Его, биен будет много. Сам Господь свидетельствует: И не точию заповедей Христовых кто не сотворит, но аще кто и святых ученик апостол и учителей не послушает. И иже аще рече: Не приимет вас, ниже послушает словес ваших, исходяще из дому или из града того, отрясите прах ног ваших. Аминь, глаголю вам, отраднее будет земли Содомстей и Гоморстей в день Судный, неже граду тому.

Виждь, како Господь с клятвою извещает, что будет, иже не приемшим словес святых Его ученик (л. 931 об.) [3788] и апостол и святых учителей. А иже кто крестився и обет со Христом положив хранити святыя Его заповеди, и не сохрани завета Божия и своего обещания, которых мук будет достоин? Не паче ли тех, которыя не прияли в дому своя, ниже послушали словес апостолских, их же Господь осуди паче содомлян и гоморян. А иже кто сам не хранит заповедей Божиих, но и хранящих гонит и всяко ненавидит без правды, и не просто гонит, но и о заповедех Божиих не радети соблаговолит, что тому будет?

Господу глаголющу: Аще [3789] кто по Мне не пребудет, извержется вон, якоже розга (л. 932) [3790] изсышет, и собирают ю, во огнь влагают и згарает.

О клятвопреступницех же смотри Василия Великаго правило 64.

Клятвенник [3791], рекше кленыйся во лжю, или преступаяй истиную клятву, десять лет запрещение приимет, два лета да плачется, три да послушает Божественых писаний, четыре же лета припадает и едино лето да стоит с верными и потом Божественаго общения причастится.

Того же Василия Великаго правило 82.

По [3792] нужди кленся, по шести лет прият будет, а иже без нужди, по дванадесятом.

Толкование.

Клятся некто сего (л. 932 об.) [3793] или инаго не сотворити, якоже се судиа сый, ни подписати суда нанесенаго на некоего. И потом понужден быв от болшия власти и подписав, преступи клятву, таковый легчайшим запрещением повинен есть, нужди ради, за шесть бо лет запрещение приимет. Аще же кроме некия нужди преступит, о нем же клятся, два лета да плачется и два да послушает Божественых писаний, пять лет да пребудет с припадающими и два лета прият будет с верными и милостыни с ними приобщится. И тако по первоенадесятем лете тела и крове Христовы да сподобится.

(л. 933) [3794] Усмотрил ли о клятвопреступницех суть, како узаконоположися, яко ни церковнаго стояния, ниже с верными молитвы достоин есть. Но ли и сего не содрогаеши? Послушай самаго Христа, ко всем глаголюща: Слушаяй вас, Мене слушает, и отметаяйся вас, Мене отметается. Послушайте же Василиа Великаго правила 73.

Христов отметник во всем житии своем да кается.

Иже от Христа отвержется, во все время живота своего должне есть плакатися. На исходе же жития сподобится святаго Причащения.

Како же ты глаголеши, царю обирати патриархов и митрополитов (л. 933 об.) [3795] и архимандритов и игуменов, не имеющи власти и своего обещания к Богу не сохранив ни в чем? И того ради ни входа церковнаго достоин и вся дни живота своего клятися, и во исходе жития своего сподобится причащения. Откуду ты такия блядивыя проклятые законы приносишь и глаголешь во олтарь царю входити причащатися? Ему же божественный Златоуст на праг церковный вступати не повеле, аще и царь есть клятвопреступник. Царь же не единою, но трегубо, едино убо во крещении, и другое на поставлении царьстем, егда архиерей помаза его на царьство, тогда завет (л. 934) [3796] ему положи, глаголя: О Святем Дусе господин и возлюбленный святыя Церкве и нашаго смирения, царь и великий князь Алексий Михайлович всеа Русии самодержец. Се отныне от Бога поставлен еси царь и великий князь по данней нам благодати от Пресвятаго и Животворящаго Духа рукоположением нашаго смирения со освященным собором во святей велицей церкви Успения Пресвятыя Богородицы. И ты, господине сыну, боговенчанный и православный царь и великий князь Алексий Михайлович всеа Русии самодержец имей страх Божий в сердцы и сохрани веру христианскую греческаго закона чисту и непоколебиму. (л. 934 об.) [3797] И соблюди царьство свое чисто и непорочно, якоже ныне приял еси от Бога, и люби правду и милость и суд правый, и к послушным милостивное. Ко святей же соборней Церкви и ко всем святым церквам имей веру и страх Божий и воздавай честь, понеже в ней царю второе порожен еси, от святыя купели духовным своим порождением и ко святым честным монастырем велию веру держи к нашему смирению и ко всем своим богомолцам о Святем Дусе царьское свое духовное повиновение, по Христову евангелскому словеси: Слушаяй бо вас, Мене слушает, и отметаяйся вас, Мене отметается, отметаяйся же ся (л. 935) [3798] Мене, отметается и пославшаго Мя. И сего ради ведяще и се, елико кто честь святителю воздает и та честь самому Христу восходит, от Него же и мзды приимут сторицею, и прочее пространнее сего выше написано есть. И ничто же от сицевых сотворил, но все ни во что положи.

Третие же, егда молил царь Новгородскаго Никона митрополита со освященным собором на патриаршество, и Никон много отрицался такова великаго бремене. И по многом царьском молении и всего священнаго собора Никон митрополит царю и великому князю Алексию Михайловичю всеа Русии говорил во святей (л. 935 об.) [3799] велицей соборней апостольстей церкви, Господа Бога и Спаса нашего Иисуса Христа свидетеля поставляя и Пресвятую Пречистую Владычицу нашу Богородицу и Приснодеву Марию и святых ангел и архангел и святаго славнаго пророка и Предтечю крестителя Господня Иоанна и святых славных и всехвалных апостол и святых отец седми Вселенских соборов и всех святых пред священным собором всем и пред его царьским сигклитом и пред всеми людми. Егда изволит Бог Никону митрополиту на патриаршестве и Никон митрополит, усмотря во царе и великом князе порок, которой противен Евангелским святым заповедем или противно что (л. 936) [3800] святым апостолским и отеческим правилом, ему, Никону, по писаному во псалмех, не стыдяся говорити пред цари о заповедех Господних и святых апостол и святых отец, и пред бояры. А ему, государю царю, и ево государевым бояром слушати во всем. И он, государь, и ево государевы бояря все обещалися во святей велицей церкви пред Господем Богом и пред святою Богородицею и пред всеми святыми и всем священным собором заповедей Христовых и святых апостол и святых отец правил слушати и ничто же инако коею любо тщетною хитростию по преданию человеческому и по стихиям мира сего мудрствовати.

И от исперва убо был царь (л. 936 об.) [3801] благ, кроток, послушлив, и Никон на патрирашестве был, а как царь и великий князь развратился со святою соборною апостолскою Церковию и святыя Божия заповеди и святых апостол и святых отец правила в прездрении положил и Никона Патриарха не почал слушать, но и укоряти неподобно. И Никон Патриарх засвидетельствовав в той же велицей соборней апостольской церкви пред Господем Богом и Спасом нашим Иисусом Христом и пред святою Пречистою Преблагословенною Владычицею нашею Богородицею и Приснодевою Мариею и святыми ангелы и всеми святыми, и царю и великому князю с ризничим посылал, написав своею рукою, (л. 937) [3802] чесо ради Патриарх Никон отходит, дая место гневу царьскому. И он, государь, не ведомо чел или нет, толко то писмо Никона Патриарха назад прислал. И Никон по триех днех с Воскресенскаго подворья сшел в Воскресенской монастырь. И царь государь и до сего времяни непрестанно гнев свой держит на Никона Патриарха неведомо за что, и всяким ложным оглаголником веру имет, и многих добрых людей розослал священников и дьяконов и монахов и мирских чрез Божественыя заповеди, и сам на ся чин святительский и власть церковную восприял чрез Божественыя уставы и чрез свою клятву, еже трегубо клялся, (л. 937 об.) [3803] ово во крещении, ово во царьское поставление, ово в Никоново Патриарха поставление, еже не мудрствовати паче, еже подобает благочестивым царем. Он же, государь, не точию архиереов, архимаритов и игуменов и священников и дьяконов во свою волю привлече, множицею и Никона Патриарха в суд нудил с Романом Бобарыкиным и с Ываном Сытиным перед своим околничим Осипом Сукиным и перед думным дворянином Иваном Баклановским. И Никон Патриарх говорил тем думным людям и дьяком, что не подобно то царьское величество деет, еже нас, архиереов, чрез Божестве(л. 938)ныя [3804] уставы мирским судиям судити Патриарха. И епископа всею епархиею судят, аще ли невозможно, менши 12 нелзе судити, презвитера 6 епископов, диякона 3 епископа, а митрополита без патриарха не судит. И Осип Сукин говорил Никону Патриарху, смотря в наказ государев: Будет ты не станешь отвечать и с Ываном Сытиным и с Романом Бабарыкиным, и государь укажет по своему разсмотрению указ учинить, а для зделки пришлет два приказа стрелцов и велит так учинить, как ему годно. И Никон Патриарх говорил, что тех гроз царьских не страшится, понеже имать (л. 938 об.) [3805] Никон своего Царя и Владыку Христа, глаголющаго: Не убойтеся от убивающих тело, душу же не могущих убити. Ей, глаголю вам, кого убойтеся, убойтеся имущаго власть по убиении воврещи в дебрь огненую, того убойтеся. И говорил Никон Осипу околничему: Будет есть у тебя указ от царя такой, еже убити мя, Никона, Никон того не боится. И открыв ребра своя Никон, околничему давал, да убивает. И он говорил: Коли де такой указ государев будет, не посоромимся. Да Никон же Осипу говорил: Что Никон ино смерти своей радит, (л. 939) [3806] ни о имении коем любо, а в суд не идет чрез Божию заповедь, глаголющую: Хотящему с тобою судитися и ризу твою взяти от тебе, не возбрани ему и срачицу.