ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

И [3547] да приведеши пред храм свидения, и да собереши весь сонм сынов Израилевых, и приведеши левиты пред Господь, и да отлучит Аарон левиты отдание пред Господь от сынов Израилевых, и да служат службу Господеви. Левиты же да возложат (л. 870 об.) [3548] руки на главы телцем и да сотвориши един греха ради, а вторый во всесозжение Господу очистити от них. Поставиши же левиты пред Аароном и пред сынми его, и да отда сия отдание Господу.

И да отлучиши левиты от среды сынов Израилевых и да будут Мне. По сем же да внидут левиты служити службу в храме свидения, и да очистиши их, и да отдаси я отдание пред Господем, яко отдания отданы сии Мне суть, от среды сынов Израилевых, отверзающих место. Всяка ложесна первенец всех от сынов Израилевых приях я Себе, яко Мне есть весь первенец [3549] от сынов Израилевых, от человека до скота (л. 871) [3550] в день, в онь же побих весь первенец в земли Египетстей, освятих я Себе. И поях левиты вместо всякаго первенца сынов Израилевых, отдах же левиты отданием Аарону и сыном его от среды сынов Израилевых в храме свидения, и да молятся о сынех Израилевых, яко да не будет гнев на сынех Израилевых, егда приступити им ко святым.

И сотвори Моисей и Аарон и весь сонм сынов Израилевых левитом, якоже заповеда Господь Моисею о левитех, тако сотвориша им сынове Израилевы. И очистишася левиты и исправиша ризы своя и отдаст я Аарон отдание пред Господем и помолися о них (л. 871 об.) [3551] Аарон очищения ради их. По сем внидоша левиты служити службы их в храме свидения пред Аароном и пред сынми его, якоже повеле Господь Моисею о левитех, тако сотвориша.

И рече Господь к Моисею, глаголя: Се есть о левитех, от 25 лет и выше да внидут служити служение в храме свидения, от 50 же лет да останут служения и да не служат по сем и да служат братия его, в храме свидения стрещи стражбу, а дела да не делают. Тако сотвори левитом в стражбе их.

И рече Господь к Аарону, глаголя [3552]: Ты и сынове твои и дом отца твоего с тобою (л. 872) [3553] да возмете первенства грех святых, ты же и сынове твои да приимете грехи жречества вашего, и братию твою, племя Левиино, сонма отца твоего и приведи к себе, и да предстанут тебе, и да послужат тебе, и тебе и сыном твоим пред храмом свидения, и да блюдут стражбы твоя и стражбы храма. Разве к сосудом святым и ко олтарю да не приступают, да не измрут и сии и вы. И приложится к тебе и да блюдут стражбы храма свидения и вся службы храма, а иноплеменник да не приступает к вам. И да соблюдет стражбы святых и стражбы олтаря и не будет (л. 872 об.) [3554] к тому гнева на сынех Израилевых.

Аз [3555] бо взях братию вашу левиты от среды сынов Израилевых, вам в дар вданый, Господу служити службы храма свидения. Ты же и сынове твои с тобою сохраните жречество ваше по всему делу олтаря и внутрьняя завесы, и да служите службы вдания вам жречествоваше, иноплеменник же приступаяй да умрет. И рече Господь ко Аарону: Се Аз дах вам снабдение принос моих и от всех священных Мне, от сынов Израилевых тебе дах я в старейшинство и сыном твоим по тебе закон вечный. И [3556] сие да будет вам от всякаго священнаго святых, от всех (л. 873) [3557] даров их и от всех треб их и от всякаго преступления их и от всех грех их, елика отдают Мне от всех святых. Всяко участие святых, елико аще отлучат сынове Израильстии Господу, тебе дал есмь и сыном твоим с тобою и дщерем твоим закон вечный, завет соли людстей вечный пред Господем тебе есть и племени твоему по тебе.

И рече Господь ко Аарону [3558]: В земли их да не причастиши, части тебе да не будет в них, яко Аз часть твоя есмь и причастие твое среди сынов Израилевых, сыном же Левиином се дал есмь всю десятину во Израили в причастие в службы место их. (л. 873 об.) [3559] Елико служат сии служение в храме свидения и да не преступают по сем сынове Израильстии к храму свидения прияти греха смертнаго, но да служат левити сами службу храма свидения и сии возмут грех их в закон вечный в рожения их и среди сынов Израилевых да не причастят причастия, яко десятину сынов Израилевых, елико аще отлучат Господу, участие дал есмь левитом в причастие. Сего ради рекохом среди сынов Израилевых, да не причастятся причастия. Паки [3560] во втором законе писано есть: Во оно время отлучи Господь племя Левиино носити ковчег завета Господня и предстояти (л. 874) [3561] пред Господем, служити и молити и благословити имя Его до днешняго дне. Сего ради несть левитом части, ни жребия в братиях. Господь бо Сам причастие их, якоже есть рекл им. И паки рече Господь [3562]: Да не будет жерцем и левитом и всему племени их части, ни жребия со Израилем, присно бо Господь часть их да ядят я. Жребий же да не будет в братии его, Господь бо сам наследие его, якоже глаголал им. И паки рече Господь к Моисею на запади Моава у Иордана при Иерихоне, глаголя: Заповеждь сынем Израилевым, и дадят левитем от причастия одержания их, грады вселитеся и хлебины, града окрест их (л. 874 об.) [3563] дадят левитем, да будут гради их вселятися и участия их да будут скотом их и всему четвероножному их. И обдержание градов их же дасте левитом от стены града вне две тысящи лакот окрест, и да измереши страну вне града, юже на восток, двою тысящу лакот. И страна, иже к северу, двою тысящу лакот, и страна, яже к морю, двою тысящу лакот, и страна, иже к западу, двою тысящу лакот. И грады же посреде сего да будут вам и содержания градов [3564] и грады, яже дасте левитом 6 град да будут убежных, иже дасте бегати (л. 875) [3565] в ня убившим. И к сим же 40 и 2 грады. Всех градов, их же дасте левитом, 40 и 8 градов и хлебины их. Сия же и грады, их же дасте им, от одержания сынов Израилевых от многих много, от малых мало, койждо по причастию своему, еже причастят, да дадят от град левитом.

Такожде же и от плена повеле Господь отлучити себе. И рече Господь к Моисею, глаголя: Возмите от корысти пленнаго от человека до скота.

Ты [3566] и Иелизар жрец, и князи племен сонма и да разделите корысти между воины, ходившими на сечь, и между всем сонмом, и да отлучите Господу, и дадите и Елизару (л. 875 об.) [3567] жрецу дань Господу. И сотвори Моисей и Елиазар жрец, якоже повеле Господь Моисею. И бысть множество полону, иже полониша воинстии от овец 675 тысящ, волов же 72 000, ослов же 61 000, душ же человеческих от женска полу, яже не бяше прилеплена мужех, всех душ 32 000.

И приидоша к Моисею вси воставленнии над тысящами силы и сотницы силы, и рекоша к Моисею: Отроцы твои взяша сочтение, от муж воинских, иже суть у нас, и никто же не погибе от них. Се же принесохом дар Господу, еже кто обрел есть сосуд злат, обручи и гривны, перстни, усерязи (л. 876) [3568] и чепи златы, очыстити о нас пред Господем. И взя Моисей и Елиазар злато от них весь сосуд соделан, и бысть всего злата участие, еже отлучися Господу, 16 000 и 608 сикл, от тысящник и от сотник мужи воинстии плениша койждо себе. И взя Моисей и Елиазар жрец злато от тысящник и сотник и внесоша и в храм свидения, память сынов Израилевых пред Господем.

Такожде [3569] же Иисус Наввин заповеда сыном Израилевым при Ерихоне, глаголя: Град сей проклят, все же, иже в нем, Господеви сил. Вы же снабдитеся от клятвы и да некогда помыслите вы взяти от клятвы и сотворите полчище от сынов Израилевых клятвы (л. 876 об.) [3570] и потребите ны. Злато же все и сребро и медь и железо свято да будет Господеви, в сокровище Господне да ся несет. И бысть егда град запалиша огнем со всем, еже бе в нем, разве злата и сребра и меди и железа, отдаша в дом Господень внести.

Разсмотри, богоборче, князю Никито, како глаголеши, яко слободы патриарши и митропольи и владычни и монастырския не все ли суть Божие и мы Его есмь, развее тебе и подобных тебе? Не Его вы есте. Не все ли изначала бысть по Божию велению и заповеди, священническая часть, Божия часть и достояние? Почто преминув (л. 877) [3571] болшаго, еже Бога, к меншим низходиши, то есть к нам, смиренным, и называеши Божию часть и достояние. Наше достояние, не суть ли наше достояние [3572], Божие есть достояние, и якоже древле по Божественей заповеди одесятствоваша людие, тако и в Новом законе давали благочестивыя цари, якоже Константин Великий, иже есть писано выше сего в заповеди его.

Такожде и на Русии великий князь Владимир, крестивый Рускую землю, и подобныя тем, давали во святыя Божия церкви, Пресвятей и Живоначалней Троице и Господу Богу и Спасу нашему Иисусу Христу, и Пресвятей (л. 877 об.) [3573] Пречистей Преблагословенней Владычице нашей Богородице и Приснодевей Марии, и святым ангелом и архангелом, и святому Иоанну пророку и Предотечи, и святым всехвалным верховным апостолом, и святым великомучеником, и святым верховным учителем и святителем, и преподобным и богоносным отцем, и всем святым, а не патриарху и митрополитом и владыкам и монастырем, якоже свидетельствуют писаныя их заповеди, великаго царя Константина и великаго князя Владимира и прочих боголюбцев и христолюбцев жаловалныя грамоты и вкладныя. Ов убо дал Пресвятей и Живоначалней Троицы, (л. 878) [3574] ин же святому Спасу Христу человеколюбцу, ин же Пресвятей Богородицы и прочее, якоже выше сего писано. И быша таковыя слободы в послужение святым Божиим церквам вместо левит, якоже выше сего писано, якоже и святых апостол правила показуют.