ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Егда [3479] бо яко агнец заклан бысть Христос, тогда Ю Своею кровию уневести. Якоже бо Адаму спящу [3480], создана бысть жена отъятием ребра, суще и Христу на кресте волею чрез смерть уснувшу, излия(л. 857)нием [3481] крови из ребра, Церковь состоящаяся есть, Уязвленому сочтася. Якоже и Павел [3482], божественный апостол, явно о сих творит слово, глаголя: Мужие, любите своя жены, якоже и Христос возлюби Церковь и Себе предал есть за Ню, да очистит Ю и святит банею водною глаголом, да представит Ю Себе славну Церковь, не имущую скверны или порока или нечто от таковых, но да есть свята и непорочна.

Зриши ли Церковь и что есть Церковь, и како Ю Христос себе обручи и очисти, то ты почто олюбодействова Ю и вся святыя Ея законы разврати и обесчести и Главу (л. 857 об.) [3483] Ея, Христа, уничижы и преобиди? Якоже апостол глаголет: Занеже муж есть глава жены, якоже и Христос глава Церкви и Той есть спаситель телу. Господу учащу и засвидетельствующу: Якоже хощете, да творят вам человецы, и вы твористе им такожде.

Хощеши ли, дабы раб твой олюбодействовал жену твою, аще и ничто же люто пострадал еси ея ради, ниже кровь свою пролиял, якоже Христос, чтобы не помыслил еси таковому неправедному и злому рабу сотворити. Мню, яко никако бы попустил еси жити таковому, якоже древний закон повелевает (л. 858) [3484] таковых камением побивати, тако и градский закон смертию казнити. Ты же царьскую и Агньчю жену любодействова, не имущу скверны или порока или некое от таковых, мниши ли ся без мук быти? Ей, имаши тмами мучен быти во веки веком, якоже и божественный Златоуст глаголет: Завидяй [3485], з Богом ратуется, а не со онем. Егда увидиши благодать имущаго и болезнуеши и хощет низложити Церковь, не со онем ратуется, но з Богом. Рцы бо ми, аще кто украсил отроковицу цареву и благоискуствовал, украшая ю и честну соделоваяй, (л. 858 об.) [3486] ин же некто хотел бы сию безобразити, не возмогл бы он и немощну бывшу украсити ю, коего бы наветовал сего, или оную и отца ея? Такожде и ныне ты, завидяй, ратуешися с Церковию, на Бога ополчаешися, понеже бо благоискуству братнему соплетеся и церковная полза, нужда сему разрушающуся и оной разорится. Тем же по сему дело сатанинско твориши, наветуяй на тело Христово, много паче на Христа. Якоже бо и тело и глава един есть человек, тако и Церковь и Христос едино быти глаголет [3487].

Послушай, откуду церковныя законы привзошли (л. 859) [3488] суть, свыше суть, от Бога же приходит [3489] и с небес вещает. Или не веруете, яко от Бога суть сия глаголемая? Послания суть от Бога, основания же стены блажении суть апостоли [3490], на них же Христова Церковь основана бысть. Стена же церковная Христос есть. И почто убо раскопываеши и разрушаеши стену Церкви Христа? Светило Церкви Христос, почто ты тма сый погашаеши, на камени бо создана есть. Ей же, и врата адова не удолеют [3491]. Откуду убо истина разума сего и пророчества явна есть, како не одолеша адова Церкви, како же всегда с нами есть Христос. Не бо, аще бы не был с нами (л. 859 об.) [3492] Христос, одолена бы Церковь. Како Евангелие простреся повсюду по вселенней, должни же суть и иже на ны рекшии древность свидетельствовати книгам, иже о Келсе и Ватанеоте и сущем по онем, не бо, иже по них сложеным супротив глаголаху [3493]. И како же и вселенная вся единогласно приемши то, и аще бы не была Духа благодать, не бы толико было согласие от конец в концы земли, но пленени были быша скоро притворяющии и не толика исправления от прелести и лжи составишася. Или не зриши вселенную всю приступльшую прелесть разорену, не бо от нас точию днесь славится, (л. 860) [3494] но свыше от Бога и от ангел и от Отца.

В [3495] месяц же шестый послан бысть ангел Гавриил от Бога во град Галилийский, ему же имя Назареф, к девей, обрученей мужеви, ему же имя Иосиф, от дому Давидова [3496], и имя девей Мариям. И вшед к ней ангел, рече: Радуйся, обрадованая, Господь с тобою, благословенна ты в женах. Она же видевши, смутися о словеси его и помышляше, каково будет целование се. И рече ангел к ней: Не бойся, Мариям. Обрете бо благодать от Бога. Таже ангел от пророк свидетельствует девей, глаголяй, иже Исаия прорече: И [3497] се зачнеши во чреве и родиши Сына и наречеши имя Ему Иисус. Сей будет (л. 860 об.) [3498] велий и Сын Вышняго. И даст Господь Бог престол Давида, отца его, и воцарится [3499] в дому Ияковли вовеки, и Царьствию Его не будет конца.

Слышал еси ангела, свидетельствующа от пророк? Сей велий наречется. Ты же како умаляеши? И паки рече ангел: И царьствию Его не будет конца. Ты же для чево Царьство Христово скончал своим беззаконным изложением и на всех власть князя мира сего утвержаеши? Не слышал еси ангела Божия, яко князь мира сего прейде, а иже ин никто же приходяй, разве антихриста. Якоже и Богослов свидетельствова, рече о вас. И ныне, рече, антихристи мнози.

(л. 861) [3500] Таже паки рече Мариям ко ангелу: Како будет се, идеже мужа не знаю? И отвещав ангел, рече ей: Дух Святый найдет на тя и сила Вышняго осенит тя. Тем же и раждаемое свято наречется Сын Божий. И по мале. Яко не изможет от Бога всяк глагол.

Такожде и в Матфеи речеся [3501]: Сия же ему помыслившу, се ангел Господень во сне явися ему, глаголя: Иосифе, сыну Давидов, не убойся прияти Мариам, жены твоея, Рождьшее бо ся в ней от Духа есть Свята. Родит же Сына и наречеши имя Ему Иисус. Той [3502] бо спасет люди Своя от грех их. Се же все бысть. Да збудется реченое от Господа пророком, глаголющим: (л. 861 об.) [3503] Се дева во чреве приимет и родит Сына, и нарекут имя Ему Еммануил, еже есть сказано «с нами Бог».

Тебя ли единаго не спасет Христос Бог или несть с тобою Бог? Паки инде пишет: Приидет [3504] от Сиона избавляяй и отвратит нечестие от Иякова. И Отец свыше свидетельствова: Сей есть Сын Мой возлюбленый, о Нем же благоволих. Ты почто паки вводиши? Или не слышал еси, якоже пишет [3505]: Кончина закону Христос. И паки инде пишет: Тем [3506] же закон пестун нам есть во Христа. Хощеши ли, да покажем ти и о апостолех пророческое свидетельство, яко не точию Христа (л. 862) [3507] подобает прияти, но и святых ученик Его и апостол. Исаия глаголет [3508]: Коль красны ноги благовествующих мир, благовествующих благая, но не вси послушаша благовествования их. Паки Исаия глаголет [3509]: Господи, кто верова слуху нашему? И паки Давид глаголет [3510]: Во всю землю взыде вещание их и в концы вселенныя глаголы их. И посла Своя рабы с высоким проповеданием. И Господь глаголет: Се Аз посылаю вы. Шедше в мир весь, проповедите Евангелие всей твари. И инде рече: Се Аз посылаю вы, яко овцы посреде волков. И апостол глаголет: Како же услышат бес проповедающаго. Како же проповедят, аще не послани будут? [3511] (л. 862 об.) [3512] А яже тем, не ин кто посла и повеле засвидетельствовати, но сам Господь Бог, глаголя: Но [3513] приимите, рече, силу, нашедшу Святому Духу на вы и будете Ми свидетели во Иерусалиме же и во всей Июдеи и Самарии, даже и до последних земли. Рече [3514] же им: Сии суть словеса, яже глаголах вам, еще сый с вами, яко подобает скончатися всем писаным в законе Моисеове и псалмех о Мне. Тогда [3515] отверзе им ум разумети Писания. И рече им: Яко тако писано есть и тако подобаше пострадати Христу и воскреснути от мертвых в третий день и проповедатися во имя Его покаянию (л. 863) [3516] и отпущению грехов во всех языцех, наченше от Иерусалима. Вы же есте свидетелие сим. И се Аз послю обетование Отца Моего на вы. Вы же сядите во граде Иерусалимсте, дондеже облечетеся силою свыше. И егда скончашася дние пятьдесятницы, беша вси апостоли единодушно вкупе. И [3517] бысть внезапу с небесе шум, яко носиму дыханию бурну, и исполни весь дом [3518], идеже бяху седяще, и явишася им разделени языцы яко огнени. Седе же на единем коегождо их и исполнишася вси Духа Свята, и начаша глаголати инеми языки, якоже Дух даяше им.

Видел ли еси, откуду прииде к нам Евангелие, (л. 863 об.) [3519] яко с небесе и како апостоли Христовы умудришася? Не о себе, но якоже Дух даяше им. Но ни по толицей благодати и приятии Святаго Духа престаша апостоли от закона и пророк свидетельствовати.

Став [3520] же Петр со единем на десяте, воздвиже глас свой и рече им: Мужие июдейстии, живущии во Иерусалиме вси. Се вам разумно да будет и внушите глаголы моя, не бо якоже вы мните, сии пиани суть, есть бо час третий дне, но се есть реченое пророком Иоилем: И [3521] будет в последняя дни, глаголет Господь, излию от Духа Моего на всяку плоть, и прорекут сынове ваши, и дщеря ваша и юноша (л. 864) [3522] видения видят, и старцы ваши сония видят, ибо на рабы Моя и на рабыня Моя во дни оны излию от Духа Моего, и прорекут. И прочее. Свидетельствова от закона и пророк о Христе Иисусе.