ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Но что глаголю о клятвах сих, (л. 849) [3448] оставль сущих на торжищи, тамо бо ничто же таково имаши рещи. О десяти бо медницах клятвы бывают и клятвопреступления. Како бо грома трескновение свыше не сходит, како не вся превращаема бывают? Стоиши, обязуяся Богом, чесо убо ради да зелия оградная возмеши, да сапоги за малы сребреники, на свидетельство и призывая, да не убо елма не мучени есмы, не пщуем ниже согрешати. Сие человеколюбия есть Божия, а не нашея добродетели, кленися детищем твоим, кленися сам собою, рецы, да тако мучитель не настал бы на ребра моя, коли боишися. И убо ребр твоих (л. 849 об.) [3449] безчестнейши ли есть Бог, главы твоея худейши ли, рещи сице, да не ослепею, но Христос убо тако нас щадит, яко возбраняти не клятися ни своею главою. Мы тако не щадим славы Божия, яко везде Его влещи, яко худое нечто, еже аще клятвы ради и лишимся Его. Можем без Него пребыти, и аще без Него пребудем, разумей, где будем. Не со онем ли, иже лжи отец именуется и есть?

Закон положен [3450] есть, паче же не мы положихом, да не будет. Не нарицайте бо, рече, учителя на земли, закон положил есть Христос, да никому же будет клятися. Обаче же аще хощеши, (л. 850) [3451] то кленися сам собою, не противу Христу законополагая, глаголю. Да не будет, рече, вам еже ей, ей и еже ни, ни, но сходяй вам, да паче на сие вас приведут и обычая отведу мучителскаго, колицы во иных благоискусни бывающе погибоша от сих вещей.

Хощете ли навыкнути, чесо ради прощаху древним клятися? Клятвопреступати бо ниже онем прощено бысть, понеже идолми кленяхуся, не срамлясте ли ся в сих пребывающе законех, в них же наставляхуся, немощни суще. Тем же великим и светлым гласом [3452] проповедаю всем и засвидетельствую, яко законопреступление сие (л. 850 об.) [3453] показующих, иже яже суть от лукаваго вещающих. Сие бо есть клятва, на праги не ступати церковныя, но нарок вам да будет месяц сей настоящий, дабы исправити. Да не убо ми речеши, яко нужда мя вещей принуждает, яко не веруем есмь, прежде от обычая кленущихся отсецы, вем, яко мнози посмеются нам. Но лутче нам посмеяном быти ныне, нежели горети тогда, посмеют же ся, елицы беснуются. Кто бо, рцы ми, ум имея, соблюдаемей заповеди, посмеется? Аще же убо и посмеются, но не нам, но Христу таковии посмеются. Содрогосте ли ся о реченем? Вем (л. 851) [3454] и аз, и аще убо аз закон сей введох, мой был бы смех. Аще же законоположник есть другий, то тамо преходит на хухнание [3455] сие и заплеван бысть иногда Христос [3456] и по ланитома ударен бысть и заушен бысть. Терпит и ныне сия и ничто же не в лепоту.

Сего ради геена уготована бысть, сего ради червь нескончаемый. Се паки глаголю и засвидетельствую, иже кто хощет, да смеется, иже хощет, да ругается. На сие предлежим, воеже насмеваемом быти и наругаемом, воеже вся пострадати. Отреби миру есмы, по блаженному апостолу: Аще кто не хощет исправити сие повеление, (л. 851 об.) [3457] якоже трубою некоею словом сим заповем, на враги не вступати церковныя таковому, любо и князь был бы, любо и сам той, иже диядиму на себе носяй и престолом царьским красяся, и сия слышав, не терпят, но отскачют. Но лучше есть един творяй волю Господню, нежели тмы законопреступных, от сего бо вся превратишася, вся горе и долу быша, зане якоже на позорищах множества народа желаем, а не множества искусна. Что бо народ, рецы ми, возможет ползовати? Хощеши ли навыкнути, яко народ святии суть, а не иже мнози? Изведите на брань сто тем и единаго (л. 852) [3458] святаго, и увидим, кто множае исправил бы. Изыде Иисус Наввин на брань и сам вся исправил есть, а инии ничто же ползоваша. Мног народ, егда воли Божией не творит, ничим же разньствова от не сущих.

Пристанище [3459] воистину не блазнено, еже не клятися. Пристанище, воеже не погружатися от сопротиво нападающих ветров, аще бо и гнев, аще и налог, аще и ярость превоспалит, и аще что любо буди, душа во известии устроена бывши, и тако ниже бы произнесла что от недолжных изрещися, не бо в нужди устроил есть себе, ниже в законе.

Зри, что клятвы ради сотвори Ирод, (л. 852 об.) [3460] главу усече Предтечеву [3461]. Клятвы бо ради, рече, и совозлежащих с ним не восхоте ю отринути.

Что клятвы ради пострадаша племена [3462] от племени Вениаминов?

Что клятвы ради пострада Саул [3463], ов убо клятвопреступил есть? Ирод и клятвопреступления горше содела убийство. Паки Иисус Наввин клятвы ради о гаваонитянох якова пострада. Веси, сатанинская бо есть воистину сеть, еже клятися. Тем же да расторгнем сиа ужа и во удобстве устроим себе всякаго хранениа, да сподобимся от сатанинския сия сети, бояся Владычни заповеди.

(л. 853) [3464] Помяни, что пострада Анания, во своих обетех солгав. Тем же, иже солгавшии, токмо таковая пострадаху [3465], а иже и клятвопреступающии, что не постраждут? Паче же аще просте рекшия жена, ей, на то лице, толику подъят казнь и не отбеже. Помыслите, крест целующи в клятве и клятву преступающии, коего будут достойни мучения? Аще ли же убегаем кленущиися да не дерзаем, на наше бо зло сие бывает, елма что не пщуете колицы по Анании и Сапфире, таяжде онем дерзнуша, а на таяжде пострадаша. И како, рече, не пострадаша, не понеже (л. 853 об.) [3466] простися им, но понеже на болшее соблюдаеми зло. Тем же иже многая согрешающии, не мучими паче, нежели мучими боятися и трепетати должни. Возрастают бо им томления, не томления ради и долготерпения Божия. Елма многия бывают ныне, якоже при потопе [3467], но потоп не бывает, имут бо потоплени быти во тме кромешней и томлением. Мнози согрешают, якова же содомляне, но огненый не сниде дождь, огненая убо есть уготована река. Мнози фараонитская дерзнуша [3468], но не пострадаша яже фараон, ниже потоплени быша в Чермнем (л. 854) [3469] мори, пучина бо их ожидает бездны, идеже не с нечестием томление, ниже потопитися мощно есть, но на множае мучимым.

Мнози [3470] вояже израильтяны согрешеная дерзнуша, но не угрызахутих змия, ожидает бо их червь нескончаемый. Мнози [3471] Гиезиева дерзаху, но прокажени не быша, ожидает бо их вместо проказы, еже полма растесаном быти и положитися с лицемеры. Мнози кляхуся и клятвопреступиша, аще же и убегоша, да не дерзаем, ожидает бо их скрежет зубный, но и зде негли постражут и не имут убегнути, аще и не абие ту, но (л. 854 об.) [3472] во иных гресех, даже лютейшее томление будет. Помысли яже о Сауле, иже собеззаконова жертвова и священники поби, яже о Соломоне, иже отступи от Господа Бога, Иеровоам и Ахав, за Навуфея и прочих царех беззаконнующих, аще и не абие противу греха прещение и муку прияша, но последи лютейшую. И сие ради бывает, дает ти Бог нарок, да тако отмыешися. Егда же единаче пребываеши, наводит прочее томление. Видесте ли, что пострадаша лжущии? Тем же помыслите, что постраждут и клятвопреступающии. Помы(л. 855)слите [3473] и отступисте, несть кленущемуся спастися, довлеет едино клятвопреступление все содеяти и все целу нам муку навести. И сия до зде златословеснаго наказания.

Да ты же пишешь в 12-й главе в 10-й статье: Да и в выписях ко крестному целованью сию статью ис правил святых апостол и святых отец по всем судным делам писати и велеть тое статью у крестнано целования подьячим вычитать исцам и ответчикам при многих людех вслух, чтобы про тое всякие люди ведали, как про крестное целование в правилех святых апостол и святых отец написано.

(л. 855 об.) [3474] Зде чюдитися твоему безумию достоит, солгав на Бога и на святыя апостолы и святыя пророки и святыя отцы, не постыдеся своим безумием. Да и в выписях ко крестному целованью сию статью ис правил святых апостол и святых отец по всем судным делам писати и велеть тое статью у крестнаго целования подьячим вычитать исцам и ответчикам при многих людех вслух, чтобы про те всякие люди ведали и яко втораго Июду предателя со всем своим преданием прокляли по правилом [3475]. Да и иные бы на тое смотря, к тому не дерзали, на Божественыя заповеди и святых апостол и святых отец каноны лгати. Аще не истину (л. 856) [3476] глаголю, буду подобен тебе ложь. Покажи, в которых правилех святых апостол и святых отец писано про крестное целование, да видим. Аще ли же не укажешь, достойно и праведно Евангелский суд тебе нанести по писаному: Горе миру о соблазне, им же соблазн приходит. И прочее. Или якоже Павел соблудившаго с мачехою преда сатане, да дух спасется. Ты же множае и сего, не мачеху, но сущую Матерь, рождьшую тя Духом Святым, святую соборную апостолскую Церковь обесчести, юже искупи Хритос Бог не ценою сребра и злата, но честною Своею и пречистою кровию, и обручи Ю Себе в невесту. (л. 856 об.) [3477] Якоже показа един от седми ангел Иоанну Богослову [3478]: Прииди, да покажу ти невесту, Агньчу Жену. Брак же Агньчий церковное ко Христу глаголет совокупление и смешение, его же строители божественнии быша апостоли. Чрез них же Ей обручение дадеся духовное, яко восприемлющии тогда лицем к лицу чисто и святое сего смешение. Добре же невесту Агньчю Жену глаголет.