ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Евангелие: И [3397] иже главою своею кленыйся, яко не можеши власа единаго бела или черна сотворити.

Толкование.

Бог един токмо кленется Собою, яко ни под ким сущ. И [3398] клятся Господь Аврааму, понеже ни единем имяше болшим клятся, клялся Собою, глаголя: Аз Господь Бог твой и положу завет Мой между Мною и между тобою, истиною благословствуя, благословлю, и множа, умножу тя зело. Семени твоему дам землю сию (л. 834) [3399] и по тебе в род и род до века. Верова же Авраам Богу и вменися ему в правду. И паки инде речено есть: Клятся [3400] Господь Давиду истиною и не отвержется ея. И паки инде: Клятся Господь и не раскается. Мы же, собою не владуще, како можем во главу свою клятися, инаго стяжания сущу? Аще ли твоя есть глава, и не лепа есть, премени ю в лепую. Аще ли не можеши ю пременити, ини же власа черна на дело, почто кленешися главою своею, не суще своею, но создавшаго ю?

Евангелие: Горе [3401] вам, вожди слепии, глаголюще: Иже аще кленется церковия, ничесо же есть, а иже (л. 834 об.) [3402] кленется златом церковным, должен есть. Буии слепии, кое бо боле есть, злато ли или церкви, святящиа злато, ничесо же есть, а иже кленется даром, иже верху его, должен есть. Буи слепии, что бо боле, дар ли или олтарь, святяй дар, иже убо кленется олтарем, кленется им и Сущим верху его. И иже кленется Церковию, кленется Ею и Живущим в ней. И кленыйся небесем, кленется престолом Божиим и Седящим, и кленыйся Крестом, кленется и Распятым на нем.

Како же ты, Евангелский ругателю, смел в клятву живоносное (л. 835) [3403] и спасеное древо Креста употребити, им же вечная клятва разрушися, по писаному: Христос [3404] ны искупил есть от клятвы законныя, быв по нас клятва. Писано бо есть [3405]: Проклят всяк висяй на древе, да во языцех благословение Авраамле будет о Христе Иисусе, да обетование Духа приимем верою.

Братие, по человеку глаголю, обаче человеку утвержена завета, никто же отметает. Аврааму же речени быша обеты и семени его, не глаголет же семенем, яко о мнозе, но яко о едином «и семени твоему, яко есть Христос».

Толкование.

Смотри, богоборче и Христоборче, (л. 835 об.) [3406] чево ради крест бысть и что ради креста бысть. Крест клятва бысть, но Христос нас ради клятва бысть и своим Божеством преложи во благословение. Да благословятся о Нем, рече, вси языцы. И никто же смеет, якоже рече апостол, отметает или приповелевает. Единаго тебя не искупи Христос, понеже обетования Духа не приемлеши, ово отметаешь, ово приповелеваешь. А не погрешит слово истины, аще кто речет, яко безпосредственне все доброе Божие отринул еси от себя и все лихое и злое приповелел еси. Крест дан во благословение, а ты то преложил (л. 836) [3407] в клятву. И збысться реченое [3408]: Слово бо крестное погибающим убо юродство есть. И другое писание: Аще кто не возмет креста своего и вслед Мене не грядет, несть Мене достоин. Ты же не точию прият крест на рамо свое, но и обруга того и вместо благословения клятву сотвори.

И збысться писаное: Ров изры, ископа и, впадется в него. И другое писание: Обратится болезнь его на главу его. И паки третие: Оружие извлекоша грешницы и напрягоша луки [3409] своя [3410], состреляти нища и убога, заклати правыя сердцем. Оружие внидет в сердца их и луцы их (л. 836 об.) [3411] сокрушатся. И паки: Ею же мерою мерите, возмерится вам, и им же судом судите, осудитеся.

В твоем Уложении написано: глава 1 статья 1.

Будет кто иноверцы какия веры ни буди, или руской человек возложит хулу на Господа Бога и Спаса нашего Иисуса Христа и на Честный Крест, и про то сыскивати всякими сыски накрепко. Да будет сыщется допряма, и того богохулника казнити, зжечь. И про твое беззаконие и хулу на Господа Бога и Спаса нашего Иисуса Христа и на святый Божественый Крест Господень уста твоя и руки твоя свидетельствуют глаголаное и писаное (л. 837) [3412] Уложение, по писаному: Рабе лукавый, от уст твоих сужду тя.

Ныне же паки обретохомся на широту слова к тебе. Пишешь: На криве креста не целовали и именем Божиим во лжю не ротились.

Покажи трегубому твоему беззаконию, еже предпочел еси оружие паче воина, и оружие не яко оружие Божие употребил еси, даное на сопостата нашего диавола, но оружие беззаконию и еже не клятися именем Божиим во лжю. Богу заповедающу и глаголющу: Аз же глаголю вам, не кленитеся ни небом, ни землею, ни иною коею клятвою, даже до главы своея. А ты, окаянне, преминув вся сия, (л. 837 об.) [3413] на пресовершеннейшую Главу и не на главу точию, но на всего Бога. И глаголеши: Занеже православным христианом крестное целование ротою и на криве вконец отречено бысть священными правилы. Рцы нам, которыми правилы? И паки глаголеши: Но вдан от Христа христином крест на освящение и просвещение и на отгнание врагов видимых и невидимых. И того ради православным христианом достоит святому Кресту верою покланятися и истиною и чистотою и того честнаго Креста целовати со страхом и с трепетом и чистою совестию. Сия вся предпочел еси яко лествицу святу. (л. 838) [3414] Почто ты законом своим осквернил еси Того честь и святыню? Бога заповедающу: Не кленитеся ни небом, ни землею, ниже главою своею и иною клятвою коею. А ты от пречестнейших вещей Божиих оружием Божиим Всечестным и Животворящим Крестом Господним клятися уставил. Буе ослепленне, не слышали выше писанаго, како Христос к жидом отвеща: Горе вам, вожди слепии, глаголющии, иже аще кто кленется Церковию, ничесо же есть, а иже кленется златом церковным, должен есть.

Толкование.

Сего ради слепых и буих именует Христос, яко научающих (л. 838 об.) [3415] подобная и худейшая предпочитающих. Достойна же почитанию долейшая имуще, злато, иже на храме, и херувими и стамну златую, сих почитах паче самаго храма того. Тем же и многия учаху, яко несть ничто же, еже в храм клятися, но в злато [3416], слежащее в храме. Злато бо сего ради веде честно бяше, понеже в храме слежаше, таже глаголется даром, иже верху его должен есть, и дарове, убо иже на жертвеник возлагахуся честнейшая, паче жертвеника самаго глаголаху быти. И тако предаяху фарисее, глаголюще: Яко аще кто клялся есть в злат сосуд или (л. 839) [3417] в вола или во овча, приведеное в жертву, таже клятву преступил будет, осужден бываше равна воздати, в не же клялся, или злат сосуд воздати, или вола, или овча, или ино что, в яково клятся, да рыбо, паче жертовника предпочитающе, при добытия ради. Аще ли же в храм клявся преступаше, зане не можаше воздати подобное храму, прощение сего ради имяше и нимало о сем заповедающе. Тем же и легчайшая клятва храма являшеся любодобытия ради июдейскаго в Ветхом Завете, не оставляше Христос болши быти дар, паче жерто(л. 839 об.)вника [3418]. Ныне же у нас жертовник даром паче освещается, хлеб же, ныне нами приношаемый, во Владычнее оно самое Тело прелагается благодатию Божественою. Сего ради сим жертовник освящается, тако древле убо крест поносная смерть быша, всяк бо, рече, висяй на древе, проклят. Господь же наш Иисус Христос своею неповинностию клятву преложи во благословение.

И глаголеши: И целуяй крест освящает себе и от болезни и от недуг всяческих исцелевает. Всем проповедуеши силу Божественаго Креста на освящение и болезнем на исцеление. Единому ли тебе не доста освящения и целеб, еже (л. 840) [3419] преложити Того в клятву? Или сам о себе свидетельствуеши, глаголя: А не верою и не истине, на лжи, целуяй крест, и той бо лжы обещник есть и неисцелнно вреждает себе и по Писанию яко христоубийца вменяется.

И где есть о сем писано, покажи, яже на лжи целовав, яко христоубийца вменяется? Да и аз оправдаю, еже кто на лжи целует, яко христоубийца вменяется, а иже чрез Божие веление на роте крест целовати, Богу заповедающу, и главою своею клятися. А ты, малое преминув сие, на болшое вскочи, на Главу нашу Христа и на святое Его царьское оружие всемирное спасение (л. 840 об.) [3420] Креста безчестием, от него же ад вострепета, сатана попрася, смерть изчезе. А ты един не вострепета, ни убояся.

И глаголеши: Всего злее преступати крестное целование. А еже Божия заповеди преступати, несть ли зло? Ей, Господу засвидетельствующу: Не кленитеся ни небом, ни землею, ово убо есть престол Божий, якоже небо, ово же, яко подножие ног Его, еже есть земля. Ты же, оставив долная, превыше небес взыде. Кленыйся, рече, Церковию, кленется и Живущим в ней, кленыйся святым Крестом, кленется и Распятым на нем. Не иже ли обезчестив (л. 841) [3421] Крест, обезчестил и Распятаго на нем?

Пишешь в первей главе в 1 статье: Будет кто руской человек возложит хулу на Господа Бога и Спаса нашего Иисуса Христа или на рождьшую Его Пречистую Владычицу нашу Богородицу и Приснодеву Марию или на Честный Крест и на святых угодников Его, и того богохулника, обличив, казнити, зжечь. И что есть болше, еже чрез Божественую заповедь законы иныя полагати? Самому Богу засвидетельствующу: К Тому ни на суде чай уже что ино отвещати, но слово рече, еже засвидетельствовах, то судит вы в день Судный.