ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

(л. 796) [3301] И божественный апостол глаголет: Третицею се гряду к вам, да при устех двою или триех свидетелех станет всяк глагол.

И паки: Отвергся кто закона Моисеова [3302] без милосердия при двою или триех свидетель умирает. Колице мнит горшей сподобитися муце, иже Сына Божия поправый и Кровь заветную скверну возмнив, в ней же освятися, и Дух благодати укорив. Вем бо рекшаго [3303]: Мне отмщение, Аз воздам, глаголет. И паки [3304]: Яко судит Господь людем Своим. И паки: Страшно еже впасти в руце живаго Бога. И паки: На попа хулы не приемли [3305], разве (л. 796 об.) [3306] при двою или триех свидетелех.

Святых апостол правило 75.

В послушество на епископа еретик не приятен. Но ниверный един токмо, во устех бо, рече, двою или триех послух станет всяк глагол.

Закон судный людем царя Константина Великаго перваго христианскаго, глава 2.

Во [3307] всяку прю и клеветы и шепты достоит князю и судии не послушати без свидетель мног, но глаголати к соперником и клеветником и шепотником, аще не поставите послухов, якоже закон Божий велит, прияти ту же казнь чайте, юже и на друга глаголете. Божий закон тако (л. 797) [3308] велит, да иже сего не хранит, да будет проклят.

О послусех.

Над всеми же сими достоит на всякой при князю и судии со всяцем испытанием и терпением испытание творити и не без послух осуждати. Но искати послух истинных, боящихся Бога, и нарочитых и неимущих вражды некоея же, ни лукавства, ни мерзости, ни тяжи, ни при, на него же глаголет, но страха ради Божия и правды Его. Число же послух да бывает 11 и лише сего числа в малой при от седми до триех. А мнее сего числа в меншей при не приимати. Власть же имать, (л. 797 об.) [3309] на него же глаголют судии залагати, и глаголати послухом, или присягу, или продажю, или ту же казнь. Аще ли в кое время обрящутся лжуще, не достоит убо ни во едину прю приимати послух, иже будут когда обличени лжуще и преступающе закон Божий, или житие скотское имуще, или иже о себе непобедими на присягу отъимутся.

Такожде Градскаго закона грань 27. О свидетелех.

Достоверны свидетели подобает суд кончати.

И Леона царя Константина глава 50-я, зачало 14 главы 4. О послусех верных и неверных и о недолжных (л. 798) [3310] восприятии и о пребывающих послусех далече.

Послуси [3311] имеюще или сан воинству или начинание или купно прияти суть, аще ли обрящутся послуси незнаеми и неключимо будет о послушестве их, да правят судии и муками да приидут к ним, яко да истиное исправление обрящут родителие и чада. Аще и достойное глаголюще, да не прияти будут, ни по господине, ни на господина раб, но свобоженый да послушествует, да не нудится кто на ся приводити послухи. Послухи же пред судиями на послушество приводими, первое убо без клятвы пред двема (л. 798 об.) [3312] кои пред теми разсмотрени, яже о совести суть, да глаголют. И аще о взыскаемем обрящутся глаголющее что, тогда да кленутся, пребывающе далече в существеных винах по местом и да не нудими будут приходити, но по повеленым к ним да приидут и о совести своей да послушествуют. Аще ли кто послуха в свою вещь приведет, того же самаго послуха ино лице во иней главе нань да приведут, таковаго на онаго, онем приведена, не написати. Аще не явится убо яко вражда некая конечне последова между има, или обещанием или (л. 799) [3313] даянием на пагубу вещи послушествующему бысть.

Истину же восхощешь ведати, сам прочти тамо лежащия. Смотри убо, коликая ти свидетельства умножил, яже от Древняго Богом данаго закона Моисею, и яже от Новаго завета святаго Евангелия и святых апостол и святых отец и царьских и градских законов и устав о законных свидетелех конец постижен.

Ныне же паки о лжесвидетельстве и о послусех ложных и не приятых от закон и канонов писати начнем.

Пишешь в 1-й статье крестнаго целованья: Которым Московскаго (л. 799 об.) [3314] государьства всяких чинов руским людем доведетца по судным делем изо всех приказов крест целовать, и им или за них людем их крест целовать.

А в пятой статье: У кого будет людей нет и им самим крест целовать.

И о том показано выше сих, всякой суд верныма свидетели вершить, а будет свидетелей не будет, тогда по Древнему закону жреческим исправлением кончалися.

Ты же пишешь 14-й главы 7-й статьи.

А которые люди учнут на ком искати своих исков, а в жалобе напишут того самаго, до кого ему будет (л. 800) [3315] дело, до человека его имянно, и ответчик на душу человеку своему и имя тому человеку скажет и в таком деле крест целовать ответчикову тому человеку, которой его человек будет написан, а не тому, кого тот ответчик в суде именем скажет.

Статья 8.

А которые истцы ищут на ответчиках рублев трехсот и болши, а на суде даст ответчик на душу истцу, и в том иску крест целовати одному человеку, кому ответчик поверит. А будет ответчик возмет на душу своему человеку, и в человеке дать на волю истцу, кому истец поверит.

(л. 800 об.) [3316] И где есть писано, покажи ми известно, еже рабу за господина крест целовать? Закон отрицает единому свободну и верну свидетельствовати. И да не будет, рече [3317], един в послушество на человека по всякой обиде и по всякому греху, иже аще согрешит, но при двою или треми устех да станет всяк глагол. А ты закон положил, рабу за господина крест целовать, и что беззаконнее сего? Сугубо беззаконие. Первие, един свидетель, другое, раб, ему же повелит господин, то все сотворит, и другое беззаконие господин мнит не толь тяжко (л. 801) [3318] и грешно ему, понеже раб вместо его ротился и крест на роте целовал. А раб мнит безгрешно сотворил, господина своего послушав, таковую роту сотворил и крест целовал за господина своего душу. Раб не еже роту сотворити и крест целовати за господина, но аще бы воля была господину убити врага своего, с ним же рота есть, и повелел бы рабу своему убити того врага своего, мню, яко не отречется и то сотворити. Писано есть: Несть ученик над учителем, ни раб над господином достоит, да будет ученик яко и учитель и раб яко и господь его. И како может таковой свидетел(л. 801 об.)ствовать [3319], а клятва или крест целовать, несть ино разве свидетельство, понеже и свидетели кленутся по испытании судиином. Богу самому заповедающему: Не приимеши слуха суетна. И что болши, самому Богу свидетельствующу древле Моисейским законом и Новым Евангелским, при двою или триех свидетелех станет всяк глагол, а не при единем и еще рабом сущим.

Церковным же законом ни епископ един приятен есть на свидетельство.

Правило святых апостол 75.

В [3320] послушество на епископа еретик (л. 802) [3321] не приятен, но ни верный един токмо. Во устех бо, рече [3322], двою или треих послух станет всяк глагол.

Толкование.

Не токмо на оклеветание еретик несть приятен, но ни на послушество. Аще един послушествует, аще и верен есть, несть приятен. И к Тимофеови бо великий Павел пиша [3323], тако рече [3324]: На презвитера послушества не приемли, аще не пред двема или треми послухи, мню же ни на оклеветание, им же отпадение наводится, своего сана епископу или презвитеру не доволно ни два послуха, аще и верна еста и непорочна.

(л. 802 об.) [3325] Святаго 4-го Вселенскаго собора святых отец, иже в Халкидоне, правило 21.

Не [3326] искушен причетник или мирский человек, глаголяй на епископа, не приятен.

Толкование.

Аще кто клевещет на епископа или на причетника, рекше на презвитера или диакона, подобает истязати прежде житие их, а не без испытания приимати их на оклеветание епископа. Аще причетницы суть оклеветающии или мирстии человецы, да некогда будут отвержени от церкве или причащения лишени, или о гресех неких оклеветаеми сами, и себе и еще не оправдивше, или инако како житие (л. 803) [3327] имуще порочно, или верою чюжди, рекше еретицы, мнози бо таковии церковное благочиние смясти и превратити хотяще, клеветами вины сшивают на непорочныя и правоверныя епископы и причетники. Таковии на оклеветание не приятни.

Святаго собора Карфагенскаго правило 59.

Причетник [3328], вещь судив, аще неугоден будет, да не позовется о том послушествовати на судище и всякаго церковника лица не приводити на послушество.

Толкование.

Аще некая два суперника пред некиим причетником изволиста судится и вину распрения пред ним объявиста, (л. 803 об.) [3329] и потом, раскаявшеся, остависта суд его и отъидеста на подобное има судище, да не позовеста на свидетельство судившаго его прежде причетника. Ово убо яко отречено ему есть от закона и не подобает его нудити неволею свидетельствовати, иже бо на священную службу упражняются, неволею не свидетельствуют. Ово же, яко оней же вещи оба суперника избраста судию, судии же возбранено есть свидетельствовати.