ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Ты же закон лаяй инем, почто сам беззаконнуеши? Не веси ли, яко несть на лица зрения у Бога? [3169] Елицы беззаконно согрешиша, беззаконно и погибнут. Неслышателие закона праведни пред Богом, но творцы закону сии оправдятся. Законополагаяй инем, убо себе ли не учиши? Проповедаеши не красти, Евангелский закон весь сокрал еси. Глаголяй, не прелюбы творити, прелюбы твориши. Аще ты неси архиерей, ни иерей, почто на Церковь неистовствуеши, судом и властию прелюбы твориши. Что убо себе тво(л. 752)риши [3170] пастыря? Овца сый. Что бываеши глава? Нога сый. Слеп сый, почто руководствовати нудишася? Грешен сый, почто оправдовати мнишися? Гнушаяся идол, святая крадеши. Иже в законе хвалишеся, преступлением закона Бога безчествуеши, имя Божие вами хулится. Божий бо устав и слово несть измены или приложения или умнения, само совершено и пречисто суще, не терпит от сих прикасающихся чесому. Аще ли чим опорочится и в мале, все таковый опроврати [3171] спасение свое, но ни без мук преминет. Богу свидетельствующу: Ведая раб волю Господа своего, а не творя я, биен будет много.

(л. 752 об.) [3172] Како же ты пишеши: Патриарху и митрополитом и архиепископом и епископом, архимандритом и игуменом и священником и диаконом судитися пред мирскими судьями, пред бояры и околничими и думными людми и перед диаки и судьи со всяких чинов людии.

Правило 8 и 9 святаго Вселенскаго 4-го собора и собора, иже в Карфагене, 15 правило и того же собора правило 104.

Людскаго суда у царя просяй, не епископ. Такожде и прочии священнаго чину, оставлше церковныя суды, к мирским судиям прибегнут, аще и оправдани будут, извергнутся.

Елицы ныне митрополити, архиепископи и епископи, архимандриты (л. 753) [3173] и игумени, священницы и диакони и прочии причетницы церковнии чрез Божественая правила под суд царьский и прочих мирских судей ходят, митрополити уже несть к тому достойно именовати митрополитами, такожде и архиепископи, и епископи, архимандриты и игумены, и попове и диакони, даже и до последних, аще в чину себе сочетовают и священных одежд лепотами являются, яко митрополити и епископи и прочии, но святых Божественых канонов извержени суть. Тем же и елико свящают, неосвящена суть, и елика благословляют, не благословена суть, ибо от тех крещени, не крещени, и поставлени, (л. 753 об.) [3174] не причетницы.

Святых апостол правило 10.

Моляйся со отлучеными, сам такожде да отлучен будет.

Правило 11.

Моляйся со извержеными, сам такожде осужден будет.

Правило 12.

Приемый инде не приятаго, сам не приятен. И аще от человек отлучени или извержени, им же причаствующии отлучени и извержени. А иже от закона Божия и заповедей колми паче тако вси отлучени и извержени, и такова ради беззакония все упразднилося святительство и священство и христианство от мала и до велика. А вся, яже суть взыщет на тебе, беззаконном предателе, всия сия соблазн и беззакония, от тебе прозябоша сия [3175] вся.

(л. 754) [3176] Еще же ти воспомянути хощу второе не менши перваго, аще и инде преже речеся, ныне же нужднейши прилучися.

Святых апостол правило 30, собора Лаодикийскаго правило 13, святаго седмаго Вселенскаго собора правило 3.

Аще кий мирских князь или людей помощию приимет церковь, да извержется и да отлучится.

Ныне вся сия бывают по указу царьскаго величества: епископи и архимандрити, и игумены, и попови, и диаконы, даже и до последних поставляются.

Святых апостол правило 34.

Без своего старейшаго ничто же да творят епископи, но токмо во своем пределе койждо, и старейший же без оных ничто же творит (л. 754 об.) [3177] полезнаго ради всем соединения.

Толкование.

Не подобает епископом кроме воли своего старейшаго, рекше без воли митрополита или архиепископа, творити излише ничто же, ни епископа поставити, ни о повелениих, ни о правилех новых стязатися, ни продати, ни отдати церковных неких вещей, но токмо достойная коемуждо в своих пределех правити и в сущих под ними странах и в селех. Но ни старейший же, рекше митрополит или архиепископ без воли всех епископов не может ничто ж таковаго творити. Сице бо творяще вси, соединения и любве заповедь соблюдут.

Государь царь (л. 755) [3178] Крутицкаго митрополита, меншаго всем болшим митрополитом, такожде и архиепископом и епископом старейшим, сотворил без собора и неизбранием. А 30-е правило святых апостол и 7-го Вселенскаго собора по 3-му правилу мирских князь помощию приимших церковь, аще бы и едина ему вручена, извергает. И есть таковый враг святыя Церкви и правилом святых апостол и святых отец извержен и отлучен. А Вселенскаго святаго 2-го собора по 1-му правилу и 7-го Вселенскаго собора по 1-му ж правилу извержен и проклят. А по 10-му правилу и по 11-му и по 12-му святых апостол со отлученым и со изверженым (л. 755 об.) [3179] моляйся, и той отлучен и извержен да будет. И святаго Вселенскаго 2-го собора по 4-му правилу и вси, от него поставлении презвитери и диакони и прочии причетницы, чюжди священия. И елицы от тех крещени, не крещени, и ниже християны нарицати тех лепо есть.

Такожде и вси, елицы ему приобщишася митрополити и архиепископи, и епископи, и прочии священнаго чина и мирстии людие, кто ни буди, по святым правилом извержены и отлучены. А еже митрополитом и епископом в чюжую епископию не преходити от своея области, многа правила покажу ти, возбраняюща, еже не приходити митрополиту (л. 756) [3180] или епископу от своея области во иную, ни поставляти презвитеры и диаконы или иное что епископское и церковное правление творити и церковных вещей. Не твердым и разрушеным быти от него сотвореным и самаго изврещи и яко псу ни во исходе души Божественых таин причастну быти, по писаному: Не дадите бо, рече, святая псом, ни пометайте бисер ваших пред свиниями. И аще единаго поставив презвитера или диакона толик страх и мука судом [3181] показана. А иже шесть лет многими епископиями владеет, коликих мук достоин будет?

Послушай правил святых апостол 14.

(л. 756 об.) [3182] От престола на престол не преходи, аще не тамо сущим лучший и учителнейший мним [3183] будеши, но и тако многих епископов разсуждением и умилением.

Толкование.

Несть достойно епископу, свою епископию оставльшу, иную восхитити, аще прежде не испытано будет и явится прежде сущим во граде том на ползу и яко учитель сый премудр. Но и тако многих епископов разсуждением и избранием и умолением. Сие же правило сокровено есть, ибо шестое на десять правило собора, иже во Антиохии, празнаго убо епископа, не имуща церкве, и в праздную церковь, не имеющую епископа, вводити (л. 757) [3184] не повелевает, но со искушением и судом совершенаго собора, сиречь всех сущих во области епископ ту сущу и митрополиту. Непраздному же епископу, имущему свою церковь, никако же не повелевает во ин град преходити. Такоже и пятоенадесять правило, иже в Никеи перваго собора, и 1-е и 2-е, иже в средце, собора, и 21-е, иже во Антиохии, собора такожде не повелевает.

Святаго Вселенскаго 1-го собора правило 15.

От града во град ни епископ, ни презвитер, ни диакон да не преходит. Понеже паки хотят обращени быти в церкви, в них же поставлени быша.

Толкование.

(л. 757 об.) [3185] Правило се не токмо епископом преступати от града во град отнюдь отрицает, но и презвитером и диаконом. И сотворшыя нечто таково, в свой град и в своя церкви, в них же поставлени быша, аки возвращати повелевает.

1-е же и 2-е правило собора, иже в средце, жесточае таковыя мучит, отставляя сих от святаго общения, и таковым епитимиами запрещает.

Святаго Антиохийскаго собора правило 13.

Аще никим же позван, ни умолен быв епископ, во иную область отшед, и поставит презвитера или диакона или правление (л. 758) [3186] некое церковное творит, такова нетверда и разрушена да пребудут, а он да извержется.

Толкование.

Многа правила обрящеши о сем, возбраняюща, еже не преходити епископу от своея области во иную и поставляти в ней презвитеры и диаконы или иное что епископское творити, токмо аще где позван будет, умолен от страны тоя епископа таковое что творити. Аще же от своего дому во иную область пришед, поставит презвитера или диакона или строению церковных вещей некое правления сотворит, нетвердым и разрушеным быти от него сотвореным и самаго изврещи правила повелевают.

(л. 758 об.) [3187] Того же святаго собора правило 16.

Иже кроме совершенаго собора, иже самаго митрополита, на праздный церкве престол наскочив, аще и сам есть празден, от епископии да будет извержен.

Толкование.