ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паисее Ликаридиусу, и на ответы Паисеовы - Никон

Зри, пагубниче, како Господь соблазнивших осуждает, яко ни жити такому оставляет зде, но на извещение тому вечных мук повелевает навязати [3134] на выю жернов осельский и воврещи во глубину морскую. Глубина же морская показание есть преисподнейшаго ада, идеже грешницы и соблазнителие верующих в Господа нашего Иисуса Христа живут, то есть мучатся. Якоже и последующее слово Божие показует, за едине уд, то есть за руку и прочих, аще соблажняет тя, рече, ввержен будеши во огнь вечный и в геенну огненую, идеже червь их не умирает (л. 745) [3135] и огнь не угасает. И сия тако суть. А иже аще кто не единаго человека соблазнит, но тысяща тысящами и тмы тмами, якоже ты, якоже Манасия весь Израиль сотвори отступити от Бога, и Улиян законопреступник новый Израиль. Но и сии легчае твоего пребеззакония, понеже не стыдно гонящу верующих Бога, и того ради не повинующиися таковым беззаконным велениям. Мнози мученически венцы увязошася и славу вечную и Царьствие Небесное получиша. Не могуще же мучения подвиг понести, крыяшеся по писаному в горах и пещерех и пропастех земных и прочих местех, и того ради и тех беззакония не сравняются твоим беззакониям.

Послушай (л. 745 об.) [3136] величество злобы твоея и беззакония.

Господу глаголющу: Его [3137] же бо посла Бог, глаголы Божия глаголет. А ты что Божиих глагол рекл еси в своем беззаконии, но все отца твоего диавола елика возглагола. Господу свидетельствующу: Аз [3138], еже видех у Отца Моего, глаголю. И вы убо еже видесте у отца вашего, твористе. Он человекоубийца есть искони и во истине не стоит, яко несть истины в нем. Егда глаголет, лжу глаголет, от своих глаголет, яко ложь есть и отец лжи. Аз же зане истину глаголю, и не веруете Мне. Тако и ныне, кто не верует словесем Божиим, он сын диаволов. А ты не точию веруеши словесем Божиим, но всюду сопротивная глаголешь и зако(л. 746)нополагаешь [3139], и еси воистину сын диаволов. Господу глаголющу: Кто от вас обличает Мя о гресе? Аще ли истину глаголю, почто вы не веруете? Почто же и ты не веруеши в Господа нашего Иисуса Христа глаголы Его и нов некак закон составляеши. Аще ли ни, то обличи о гресе Господа Бога и Спаса нашего Иисуса Христа что есть грех Его и почто не веруеши словесем Его. Богу самому свидетельствующу [3140], иже есть от Бога, глаголы Божия послушает. Сего ради не послушаете, яко от Бога несте. Аз [3141] о себе ничесо же не творю, но якоже научи Мя Отец, сия глаголю. Аз есть путь и истина и живот. А ты кто таков? Паки Господу глаголющу: Глаголы, яже Аз глаголю вам, о Себе не глаголю. (л. 746 об.) [3142] И паки: Мое [3143] учение несть Мое, но пославшаго Мя. Аще кто хощет волю Его творити, разумеет о учении, кое от Бога есть. Глаголяй о себе славы своея ищет, а ищай славы пославшаго его, сей истинен есть и несть неправды в нем. Отец [3144] же во Мне пребываяй, Той творит дела, яко снидох с небесе да не творю волю Мою, но волю пославшаго Мя Отца. И паки инде: Не [3145] могу Аз о себе творити ничесо же. И по мале: Яко не ищу волю Мою, но волю пославшаго Мя Отца. И паки Господу глаголющу: Аз [3146] есмь свет миру. Ходяй по мне, не имать ходити во тме. Ты же всех (л. 747) [3147] последующих твоему преданию свел во тму кромешную. И паки: Аще кто слово Мое соблюдет, смерти не имать видети вовеки.

Тако кто и не соблюдет слова Божия, якоже ты и последующии твоему проклятому законоположению, вечною смертию умерли.

Паки Господу глаголющу: Аще [3148] вы пребудете в словеси Моем, воистину ученицы Мои будете и разумеете истину, и истина свободит вы.

Тако кто и не пребывает в словеси Божием, несть ученик Онаго, но диавол, ниже разумеет истины, ниже свободь есть, но раб есть греху. Збысться Божественое слово о вас, иже рече: Глаголы, яже глаголах вам, (л. 747 об.) [3149] дух суть и живот суть. Но суть от вас нецыи [3150], иже не веруют, ведяше бо искони Иисус, кто суть неверующии. И паки инде рече: А неверуяй, уже осужден есть, и возлюбиша человецы паче тму неже свет. Беша бо их дела зла, всяк бо делаяй злая ненавидит света и не приходит ко свету, да не обличатся дела его, якоже лукава суть.

Тако и ты, уклонился от света евангелскаго и святых апостол и святых отец заповедей и преданий и не хощеши приити, да не обличатся яко вся дела твоя, лукавства и лжи, горести и льсти полна суть. О таковых Господь глаголет: А [3151] иже не верует в Сына, то есть Евангелию написаному (л. 748) [3152] и прочим святым законом, не узрит живота, но гнев Божий пребывает на нем. Таковый со Июдою предателем и с прочими жиды осудится во тму кромешную и с послушающими ложному тому списанию, якоже выше речеся, а неверуяй осужден есть. Еда и ты от таковых убо, иже глаголаша: жестоко [3153] слово се и кто может его послушати? И от сего мнози от ученик Его идоша вспять и к тому не хождаху с Ним. Аще ли речеши, яко веруеши Сыну Божию, послушай Иякова брата Божия, о сем возражающа тя и глаголюща: Кая [3154] полза, братия моя, аще веру кто глаголет имети, дела же не имет, еда вера может спасти его. Ты веруеши, яко (л. 748 об.) [3155] Бог един есть. Добре твориши, и беси веруют и трепещут. Хощеши ли разумети, о человече суетне, яко вера без дел мертва есть? И паки ин рече: Глаголяй, яко познах Его и заповедей Его не соблюдает, ложь есть и в сем истины несть. И паки: Всяк преступаяй и не пребываяй во учении Христове. Бога не имать. И сам Господь глаголет: Сего ради вы не послушаете, яко от Бога несте. Не любяй Мя, словес Моих не соблюдает [3156]. Святый же апостол Павел о таковых глаголет: Иже не любит Господа Иисуса, да будет проклят.

Зриши ли, беззаконноположниче, что Господь глаголет и святии апостоли о законопреступницех.

Правило Василия Великаго 45.

(л. 749) [3157] Христиан сый, ругаяся Христу, от наречения ползы не приимет.

Толкование.

Вера без дел мертва есть, никая же бо полза от наречения, еже нарицатись христианину, Христовы же заповеди отметати и делы злыми тому ругатися.

Шестаго Вселенскаго собора правило 64.

Мирский человек да не учит, не вси бо пророцы, ниже [3158] убо вси апостоли.

Толкование.

Всяк убо должен есть свой чин ведати и не творите себе пастыря овца сый, и глава да не мнится нога сый. Но повиноватися преданому от Бога чину и уши свои отверзати на послушание приемлющих благодать учительскаго словесе. Не вси бо пророцы и не вси апостоли. Сего ради мирстии человецы да не учат, ни словес о заповедех да не подвизают (л. 749 об.) [3159] тем сан учительский к себе привлачаще.

Послушай божественнаго апостола наказания: Сего [3160] ради подобает нам лишшее внимати слышаным, да некогда отпадем. Аще бо глаголаное ангелы слово бысть известно и всяко преступление и ослушание праведно прият мздовоздаяние. Како мы убежим отселе нерадивше спасении, еже зачало приемше глаголатися от Господа, слышавшими в нас известися. И паки той же святый апостол инде рече: Открывает бо ся гнев Божий с небесе на всяко нечестие и неправду человеческу, содержащих истину в неправде. Занеже разумное Божие яве есть в них, Бог бо явил есть им невидимая бо Его (л. 750) [3161] от создания мира творенми помышляема видима суть. И присносущная же сила Его и Божество, воеже быти им безответнем, занеже разумевше Бога, не яко Бога прославиша или благодариша, но осуетишася помышлении своими и омрачися неразумное их сердце. Глаголющи мудри быти, объюродеша, иже измениша истину Божию во лжу и якоже не искусиша Бога имети в разуме.

Сего ради предаст их Бог в неискусен ум творити неподобная, исполненых всякоя неправды [3162], лукавства, лихоимания, злобы, исполненых зависти, убийства, рвения, льсти, злонравия, шепотники, клеветники, богомерзки, досадителя, (л. 750 об.) [3163] величавы, горды, обретатели злым, родителем непокоривы, неразумны, непримирители, не любовны, не клятвохранители, не милостивы, нецыи же оправдание Божие разумевше, яко иже таковая творящии, достойни суть смерти, не точию же сия вся творят, но и волю деют творящих.

Слыша ли твое нерадивое ухо, что божественный апостол вещает о таковых, якоже ты и подобных тебе. Послушай же и прочая.

Сего [3164] ради безответен еси, о человече. Всяк судяй, им же бо судом судиши другу, себе осуждаеши. Тожде бо твориши, судяй, вемы же, яко суд Божий есть поисти(л. 751)не [3165] на творящих таковая. Помышляеши ли сие, о человече? Судяй таковая творящим и творя сам таяжде, яко ты избежиши суда Божия или о богатстве благости Его и кротости и долготерпения [3166] не радиши, не ведый, яко благость Божия в покаяние тя ведет. По жестокому же и непокаянному сердцу собираеши себе гнев в день гнева [3167] и откровения праведнаго суда Божия, иже воздаст коемуждо по делом его, овем убо по терпению дела благаго, славу и честь и нетление ищущим живота вечнаго. А иже по рвению и противляющимся убо истине, повинующим же ся неправде, ярость, (л. 751 об.) [3168] гнев и скорбь и теснота на всяку душю человека творящаго злое.